రాబోయే స్థానిక సంస్థల ఎన్నికల నేపథ్యంలో ఆంధ్రప్రదేశ్ మంత్రి మండిపల్లి రాంప్రసాద్ రెడ్డి చేసిన వ్యాఖ్యలు రాజకీయ వర్గాల్లో తీవ్ర కలకలం రేపుతున్నాయి. సాధారణంగా అధికార పక్షం ఎన్నికలకు వెళ్లేటప్పుడు పూర్తి ఆత్మవిశ్వాసంతో ఉంటుంది. కానీ, మంత్రి రాంప్రసాద్ రెడ్డి మాత్రం అందుకు భిన్నంగా, పార్టీ పరిస్థితిపై పరోక్షంగా ఆందోళన వ్యక్తం చేయడం ఇప్పుడు చర్చనీయాంశమైంది. రాయచోటిలో నిర్వహించిన కార్యకర్తల సమావేశంలో ఆయన మాట్లాడిన మాటలు, భవిష్యత్తుపై ఆయన వ్యక్తం చేసిన సందేహాలు చూస్తుంటే, గెలిచిన కొద్ది కాలానికే మంత్రికి ఓటమి భయం పట్టుకుందా అన్న విశ్లేషణలు మొదలయ్యాయి. గతంలో రాయచోటి జిల్లా కేంద్రాన్ని కాపాడుకోలేకపోతే మీసం తీసేస్తానని సంచలన వ్యాఖ్యలు చేసి, ఆపై ప్రభుత్వం తీసుకున్న నిర్ణయంతో కన్నీరు పెట్టుకున్న మంత్రి, ఇప్పుడు మళ్ళీ తన సొంత నియోజకవర్గంలో పార్టీ గ్రాఫ్ పడిపోతోందని బహిరంగంగానే అంగీకరించడం గమనార్హం.
ముఖ్యంగా స్థానిక సంస్థల ఎన్నికలకు సంబంధించి మంత్రి చేసిన వ్యాఖ్యలు టీడీపీ శ్రేణులను విస్మయానికి గురిచేస్తున్నాయి. రాయచోటి మున్సిపాలిటీ పరిధిలోని 42 వార్డుల్లో పోటీ చేయడానికి ప్రస్తుతం పార్టీలో సరైన అభ్యర్థులే లేరని ఆయన వ్యాఖ్యానించడం పార్టీలోని అంతర్గత బలహీనతను బయటపెట్టింది. గత సార్వత్రిక ఎన్నికల్లో రాష్ట్రవ్యాప్తంగా కూటమి గాలి వీచినప్పటికీ, రాయచోటిలో మాత్రం ఆ ప్రభావం ఆశించిన స్థాయిలో కనిపించలేదని ఆయన వాపోయారు. గెలుపు అనేది కేవలం సాంకేతికంగా మాత్రమే సాధ్యమైందని, క్షేత్రస్థాయిలో పరిస్థితి ఆశాజనకంగా లేదని మంత్రి సంకేతాలిచ్చారు. ముఖ్యంగా జిల్లా కేంద్రం మార్పు తర్వాత స్థానికంగా తలెత్తిన వ్యతిరేకతను పార్టీ ఇప్పటికీ అధిగమించలేకపోతోందని, అది రాబోయే ఎన్నికల్లో తీవ్ర ప్రభావం చూపుతుందని ఆయన ఆవేదన వ్యక్తం చేశారు.
అంతేకాకుండా, బీజేపీతో పొత్తుపై కూడా మంత్రి పరోక్షంగా విమర్శలు గుప్పించారు. పొత్తు కారణంగానే కొన్ని బూత్లలో ఫలితాలు చాలా దారుణంగా వచ్చాయని, దాదాపు 89 బూత్లలో కూటమికి అసలు ఓట్లే పడలేదని గణాంకాలతో సహా వివరించారు. భవిష్యత్తులో ఇంతకంటే భారీ మెజారిటీ మళ్ళీ రాదు, రాబోదు అని చెబుతూనే, ప్రస్తుత పరిస్థితులు భవిష్యత్తులో గడ్డు కాలం రాబోతోందని సూచిస్తున్నాయని హెచ్చరించారు. పార్టీలోని సొంత నాయకులే శత్రువులుగా తయారవుతున్నారని, గ్రూపు రాజకీయాల వల్ల పార్టీ నష్టపోతోందని ఆయన పేర్కొన్నారు. రానున్న ఎన్నికల్లో తనకు టికెట్ ఇచ్చినా ఇవ్వకపోయినా పార్టీ కోసం పనిచేయాలని అనడం, తన రాజకీయ భవిష్యత్తుపై ఆయనకే స్పష్టత లేదన్న భావనను కార్యకర్తల్లో కలిగిస్తోంది.
చివరగా, అధికారంలో ఉండి కూడా మంత్రి ఇలా నిరాశాజనకమైన వ్యాఖ్యలు చేయడం వల్ల రాయచోటి టీడీపీ క్యాడర్ పూర్తిగా అయోమయంలో పడిపోయింది. కార్యకర్తలు భవిష్యత్తులో వచ్చే కష్టాలను ఇప్పుడే ఊహించుకోవాలని, ఆషామాషీగా ఉండవద్దని ఆయన చేసిన హెచ్చరికలు పార్టీ నేతల్లో ఆందోళన కలిగిస్తున్నాయి. ఒకవైపు ప్రత్యర్థి పార్టీలు పుంజుకుంటున్న తరుణంలో, అధికార పార్టీ మంత్రి తన నియోజకవర్గంలో అభ్యర్థులు లేరని చెప్పడం ప్రత్యర్థులకు ఆయుధంగా మారింది. మొత్తానికి మంత్రి మండిపల్లి రాంప్రసాద్ రెడ్డి చేసిన ఈ వ్యాఖ్యలు రాయచోటి రాజకీయాల్లోనే కాకుండా, రాష్ట్రవ్యాప్తంగా కూటమి ప్రభుత్వ ప్రతిష్టపై చర్చకు దారితీశాయి. రాబోయే పంచాయతీ మరియు స్థానిక సంస్థల ఎన్నికల్లో ఈ ప్రభావం ఎలా ఉండబోతుందో వేచి చూడాలి.
కాగా మంత్రి చేసిన కామెంట్స్ రాష్ట్రవ్యాప్తంగా సంచలనంగా మారడంతో మంత్రివర్య… ఇదేమిటయ్యా అంటూ సొంత పార్టీ నాయకులు క్యాడర్ ఆశ్చర్యపోతున్నట్లు సమాచారం. మంత్రి మాటలు కూటమికి నష్టం చేకూర్చేలా ఉన్నాయని రాజకీయ పండితులు అభిప్రాయపడుతున్నారు
