పిల్లల ఆరోగ్యం కోసం గూడూరు ‘సంచలనం’
– ఐస్ క్రీం బండ్లపై నిషేధం, ఉల్లంఘిస్తే రూ. 5,000 జరిమానా!
సాధారణంగా ఏదైనా మార్పు రావాలంటే ప్రభుత్వ అధికారులు ఆదేశాలివ్వాలి లేదా వైద్యులు హెచ్చరించాలి. కానీ, అధికారుల ఆదేశాల కోసం ఎదురుచూడకుండా, ఒక గ్రామం తమ పిల్లల భవిష్యత్తు కోసం తీసుకున్న వినూత్న నిర్ణయం ఇప్పుడు రాష్ట్రవ్యాప్తంగా చర్చనీయాంశమైంది. గూడూరు గ్రామస్తులు తమ ఐక్యతను చాటుతూ, అనారోగ్యకరమైన తినుబండారాల అమ్మకాలపై ఉక్కుపాదం మోపారు.
అసలైన ప్రేమ అంటే అడిగింది కొనివ్వడం కాదు!
నేటి కాలంలో పిల్లలు ఏది అడిగితే అది కొనిపెట్టడమే గొప్ప తల్లిదండ్రుల లక్షణం అని చాలామంది పొరపడుతుంటారు. కానీ, ఆ తిండి వారి ఆరోగ్యాన్ని గుల్ల చేస్తుందని తెలిసి కూడా మౌనంగా ఉండటం ప్రేమేనా? ఈ ప్రశ్నకే గూడూరు గ్రామస్తులు తమ చర్య ద్వారా సమాధానం చెప్పారు. పిల్లలు అడుగుతారని, ఏడుస్తారని వెనకడుగు వేయకుండా.. అసలు ఆ అనారోగ్యకరమైన వస్తువులే తమ ఊరి దరిదాపుల్లోకి రాకుండా కఠిన నిర్ణయం తీసుకున్నారు.
ఖర్చు పెట్టి మరీ రోగాల కొనుగోలుకు స్వస్తి!
గ్రామస్తుల్లో వచ్చిన ఈ చైతన్యం వెనుక ఒక బలమైన ఆవేదన ఉంది. “మేము కష్టపడి సంపాదించిన డబ్బును నాణ్యత లేని ఐస్ క్రీంల కోసం ఖర్చు చేసి.. ఆ పైన అవి తిని పిల్లలు అనారోగ్యం పాలైతే, మళ్ళీ ఆసుపత్రుల చుట్టూ తిరిగి వేలల్లో ఫీజులు చెల్లించాలా?” అని గ్రామ పెద్దలు ప్రశ్నిస్తున్నారు.
డబ్బు వృథా: నాణ్యత లేని రంగురంగుల ఐస్ క్రీంల కోసం సొమ్ము ఖర్చు చేయడం.
ఆరోగ్యం దెబ్బ: వరుసగా వస్తున్న గొంతు ఇన్ఫెక్షన్లు, జ్వరాల వల్ల పిల్లలు శారీరకంగా బలహీనపడటం.
బాధ్యత: తమ సంతానం బాగుండాలంటే కఠినంగా ఉండక తప్పదని వారు నిర్ణయించుకున్నారు.
హెచ్చరిక బోర్డులు – రూ. 5,000 భారీ జరిమానా…
గ్రామ పొలిమేరల్లోనే పెద్ద ఎత్తున బ్యానర్లు ఏర్పాటు చేసి, ఐస్ క్రీం ఆటోలకు మరియు బండ్లకు ప్రవేశం లేదని స్పష్టం చేశారు. కేవలం బోర్డులకే పరిమితం కాకుండా, ఎవరైనా నియమాన్ని ఉల్లంఘించి గ్రామంలోకి వస్తే రూ. 5,000 జరిమానా విధిస్తామని గ్రామ కమిటీ హెచ్చరించింది.
నలుగురికీ ఆదర్శం – గూడూరు ఐక్యత.
పిల్లల భవిష్యత్తు కోసం ఒక ఊరంతా ఏకతాటిపైకి రావడం, నడుం బిగించడం నిజంగా అభినందనీయం. సోషల్ మీడియాలో నెటిజన్లు కూడా ఈ చైతన్యాన్ని మెచ్చుకుంటున్నారు. “డబ్బు కంటే పిల్లల ఆరోగ్యమే ముఖ్యం” అని నిరూపించిన గూడూరు గ్రామస్తుల ప్రయత్నం ఇప్పుడు ఇతర గ్రామాలకు కూడా ఒక గొప్ప మార్గదర్శకం (Pathbreaker) గా నిలుస్తోంది.
గూడూరు గ్రామస్తులు చూపిస్తున్న ఈ ఐక్యత, తమ బిడ్డల పట్ల వారు చూపిస్తున్న ఈ బాధ్యతాయుతమైన ప్రేమ సమాజానికి ఒక గొప్ప సందేశాన్ని ఇస్తోంది. “మేము పిల్లల్ని ప్రేమించేది వారికి తినుబండారాలు కొనిపెట్టడానికి కాదు.. వారు నిండు నూరేళ్లు ఆరోగ్యంగా ఉండాలని” అని వారు చాటి చెప్పారు.
ప్రజాప్రతిధులు, అధికారులరా… ఇప్పటికైనా గూడూరు గ్రామస్తులు తీసుకున్న నిర్ణయాన్ని సమర్థించి… రాష్ట్ర వ్యాప్తంగా దేశవ్యాప్తంగా పిల్లలు ఆరోగ్యం పై దృష్టి సారించి… భావిభారతాన్ని కాపాడాల్సిన బాధ్యత మనపై ఉంది అని గుర్తుంచుకోండి.
