మారనున్న కృష్ణ జిల్లా రాజకీయ ముఖ చిత్రం..
జిల్లా రాజకీయాలు ఇప్పుడు నియోజకవర్గాల పునర్విభజన (Delimitation 2026) అంశంతో వేడెక్కుతున్నాయి. ఉమ్మడి జిల్లాలో ప్రస్తుతం ఉన్న 14 అసెంబ్లీ స్థానాలు పునర్విభజన తర్వాత 21 నుండి 22కు పెరిగే అవకాశం ఉండటంతో, దశాబ్దాలుగా రాజకీయాలను శాసిస్తున్న ఉద్ధండుల భవితవ్యం ఇప్పుడు ప్రశ్నార్థకంగా మారింది. ఈ మార్పులు కొందరి కంచుకోటలను పటిష్టం చేస్తే, మరికొందరి రాజకీయ భవిష్యత్తును గందరగోళంలోకి నెట్టేలా ఉన్నాయి. ముఖ్యంగా ఉయ్యూరు నియోజకవర్గం పునరుద్ధరణ జరిగితే, ప్రస్తుతం భారీ ఓటర్ల సంఖ్యతో ఉన్న పెనుమలూరు నియోజకవర్గం స్వరూపం మారిపోతుంది. అలాగే నందిగామను విభజించి కంచికచర్ల, అవనిగడ్డను విభజించి చల్లపల్లి, మరియు పామర్రు-పెడన మండలాలను కలిపి మొవ్వ వంటి కొత్త నియోజకవర్గాలను ఏర్పాటు చేసే ప్రతిపాదనలు క్షేత్రస్థాయిలో చర్చనీయాంశమవుతున్నాయి.
జగన్ మోహన్ రెడ్డి నేతృత్వంలోని వైసీపీకి ఈ పునర్విభజన ఒక అగ్నిపరీక్ష వంటిదే. 2024 ఎన్నికల్లో తగిలిన ఎదురుదెబ్బ నుండి కోలుకోవడానికి ఈ పెరిగిన స్థానాలు ఒక అవకాశంగా మారవచ్చు. అయితే, నియోజకవర్గాల సరిహద్దులు మారినప్పుడు పాత సామాజిక సమీకరణాలు తారుమారవుతాయి. జగన్ పార్టీ తన ఉనికిని కాపాడుకోవాలంటే, కొత్తగా ఏర్పడే సెగ్మెంట్లలో బలమైన స్థానిక నాయకత్వాన్ని తయారు చేసుకోవాల్సి ఉంటుంది. అటు తెలుగుదేశం కూటమికి కూడా పెరిగిన స్థానాల వల్ల సీట్ల సర్దుబాటు సమస్య కొంత తగ్గినప్పటికీ, సొంత పార్టీ నేతల మధ్య పోటీ పెరిగే ప్రమాదం ఉంది. ముఖ్యంగా నూజువీడు కేంద్రంగా కొత్త పార్లమెంట్ స్థానం ఏర్పాటు కానుండటం జిల్లా రాజకీయాల్లో పెను మార్పులకు సంకేతం.
మరోవైపు, 33 శాతం మహిళా రిజర్వేషన్ల అంశం అగ్రనేతల కంచుకోటలను కదిలిస్తోంది. విజయవాడ ఈస్ట్, వెస్ట్, సెంట్రల్, గన్నవరం మరియు పెనుమలూరు వంటి కీలక స్థానాలు మహిళలకు కేటాయించవచ్చని ప్రచారం జరుగుతోంది. దీనివల్ల ఇక్కడ దశాబ్దాలుగా పాతుకుపోయిన పురుష నేతలు తమ స్థానాలను త్యాగం చేయాల్సి రావచ్చు లేదా తమ కుటుంబంలోని మహిళా సభ్యులను రంగంలోకి దించాల్సి ఉంటుంది. ఇది కొత్త తరం మహిళా నాయకత్వానికి దారి తీసినప్పటికీ, పాత తరం నేతలకు మాత్రం మింగుడుపడని విషయమే.
మొత్తానికి కృష్ణా జిల్లాలో రాబోయే ఈ భౌగోళిక మార్పులు రాజకీయ చదరంగంలో కొత్త ఎత్తుగడలకు దారితీస్తున్నాయి. కంచుకోటలుగా భావించే నియోజకవర్గాలు ముక్కలు కావడమో లేదా కొత్త మండలాలతో కలవడమో జరిగితే, నాయకుల పట్టు సడలే అవకాశం ఉంది. మారుతున్న ఈ సమీకరణాలు ఏ పార్టీకి వరం అవుతాయో, ఎవరి కొంప ముంచుతాయో అన్నది ఇప్పుడు రాజకీయ వర్గాల్లో ఆసక్తికర చర్చగా మారింది. ఈ పరిణామాలు జిల్లా రాజకీయాల్లో సరికొత్త నాయకత్వాన్ని పుట్టించడమో లేదా ఉన్న ఉద్ధండుల ప్రభావాన్ని తగ్గించడమో చేయడం ఖాయంగా కనిపిస్తోంది.
పొలిటికల్ టెంపర్ అనాలిసిస్
