కేరళ ఓటర్లు ఎటువైపు..?
ప్రశాంతంగా ముగిసిన ఎన్నికలు
మలబార్ ప్రాంత తీర్పు పైనే అందరి దృష్టి
ముస్లిం లీగ్ కింగ్ మేకర్ గా మారుతుందా..?
మే 4వ తేదీన కేరళ ఎన్నికల ఫలితాలు..
పొలిటికల్ టెంపర్ :
దక్షిణాది రాష్ట్రమైన కేరళలో 140 అసెంబ్లీ నియోజకవర్గాలకు జరిగిన ఎన్నికల పర్వం నేటితో (ఏప్రిల్ 9, 2026) అత్యంత ఉత్సాహభరితంగా ముగిసింది. ఉదయం ఏడు గంటలకే ప్రారంభమైన పోలింగ్లో ఓటర్లు బారులు తీరారు, సాయంత్రం ఆరు గంటల సమయానికి రాష్ట్రవ్యాప్తంగా దాదాపు 77.45% పోలింగ్ నమోదైనట్లు ప్రాథమిక అంచనాలు చెబుతున్నాయి. గత 2021 ఎన్నికల్లో నమోదైన 76% కంటే ఇది అధికం కావడం విశేషం. ముఖ్యంగా త్రిస్సూర్ వంటి కీలక జిల్లాల్లో 77.06% పోలింగ్ నమోదు కావడం అక్కడ నెలకొన్న హోరాహోరీ పోరుకు నిదర్శనంగా నిలుస్తోంది. ప్రస్తుత రాజకీయ పరిస్థితులను గమనిస్తే, అధికార కూటమి (LDF) వరుసగా మూడోసారి విజయం సాధించి చరిత్ర సృష్టించాలని భావిస్తుండగా, పదేళ్ల నిరీక్షణకు తెరదించి అధికారం చేజిక్కించుకోవాలని ప్రతిపక్ష కూటమి (UDF) సర్వశక్తులూ ఒడ్డింది. ఈ క్రమంలో ఉత్తర కేరళలోని మలబార్ ప్రాంతం ఈసారి రాష్ట్ర భవితవ్యాన్ని తేల్చే కీలకాంశంగా మారింది. ఇక్కడ అత్యంత బలంగా ఉన్న ఇండియన్ యూనియన్ ముస్లిం లీగ్ (IUML) పార్టీ ఈ ఎన్నికల్లో ‘కింగ్ మేకర్’ పాత్ర పోషించబోతోందని రాజకీయ విశ్లేషకులు స్పష్టం చేస్తున్నారు. మలప్పురం వంటి జిల్లాల్లో ముస్లిం లీగ్ కున్న తిరుగులేని పట్టు, సామాజిక సంస్థల ద్వారా ఆ పార్టీ నిర్మించుకున్న బలమైన ఓటు బ్యాంక్ ఇప్పుడు ఆ కూటమికి ప్రధాన ఆయుధంగా మారింది.
గత ఎన్నికల గణాంకాలను పరిశీలిస్తే….
2021 అసెంబ్లీ ఎన్నికల్లో మొత్తం 140 స్థానాలకు గానూ అధికార ఎల్డీఎఫ్ (LDF) కూటమి 99 సీట్లు గెలుచుకుని భారీ మెజారిటీతో ప్రభుత్వాన్ని ఏర్పాటు చేసింది. ఆ సమయంలో ప్రతిపక్ష యూడీఎఫ్ (UDF) కేవలం 41 స్థానాలకే పరిమితమైంది. అయితే, ఆ ఎన్నికల్లో కాంగ్రెస్ పార్టీ 93 స్థానాల్లో పోటీ చేసి కేవలం 21 సీట్లు (దాదాపు 22% స్ట్రైక్ రేట్) మాత్రమే గెలుచుకోగా, ముస్లిం లీగ్ మాత్రం 25 స్థానాల్లో పోటీ చేసి 15 సీట్లు (దాదాపు 60% స్ట్రైక్ రేట్) సాధించింది. అంతకుముందు 2016 ఎన్నికల్లోనూ ముస్లిం లీగ్ 24 సీట్లలో పోటీ చేసి 18 స్థానాల్లో విజయం సాధించి తన సత్తా చాటింది. అంటే, కాంగ్రెస్ కంటే ముస్లిం లీగ్ గెలుపు గుర్రాల సంఖ్య మరియు ఓట్లను సీట్లుగా మార్చుకునే సామర్థ్యం (స్ట్రైక్ రేట్) చాలా ఎక్కువగా ఉంటోంది. ప్రస్తుత ఎన్నికల్లోనూ ముస్లిం లీగ్ సుమారు 20 నుండి 22 స్థానాలను గెలుచుకునే అవకాశం ఉందని అంచనా వేస్తున్నారు. కేరళలో ప్రభుత్వ ఏర్పాటుకు అవసరమైన మ్యాజిక్ ఫిగర్ 71 కావడంతో, ఈ 20 సీట్లు ఏ కూటమికి అనుకూలంగా ఉంటే ఆ కూటమి అధికార పీఠాన్ని దక్కించుకునే అవకాశం మెండుగా ఉంది. ముస్లిం లీగ్ సీనియర్ నేత పి.కె. కున్హల్కుట్టి వంటి వ్యూహకర్తలు ఈసారి మలబార్ ప్రాంతంలో ఓటింగ్ శాతాన్ని పెంచి, అటు మైనారిటీల మద్దతుతో పాటు ఇతర వర్గాలను కూడా ఆకర్షించేలా పావులు కదిపారు. మే 4వ తేదీన వెలువడే ఫలితాల్లో ముస్లిం లీగ్ సాధించే సీట్లే కేరళలో తదుపరి ప్రభుత్వాన్ని నిర్ణయించే అత్యంత కీలకమైన శక్తిగా మారబోతున్నాయి.
