వినుకొండలో రాజకీయ వాతావరణం మళ్లీ వేడెక్కింది. వైఎస్ఆర్ కాంగ్రెస్ పార్టీ కార్యాలయంలో జరిగిన మీడియా సమావేశంలో పార్టీ PAC సభ్యుడు, మాజీ ఎమ్మెల్యే బొల్లా బ్రహ్మనాయుడు రాష్ట్ర ప్రభుత్వంపై తీవ్ర విమర్శలు చేశారు. ప్రజలకు ఇచ్చిన హామీల అమలుపై ప్రశ్నలు సంధిస్తూ, ముఖ్యంగా పేదలకు మూడు సెంట్ల స్థలం హామీ ఇప్పటికీ ఎందుకు నెరవేరలేదని నిలదీశారు.
సమావేశం ప్రారంభంలోనే ఆయన ఉగాది పండుగ శుభాకాంక్షలు తెలియజేస్తూ, అనంతరం ప్రస్తుత పాలనపై విమర్శలు గుప్పించారు. కూటమి ప్రభుత్వంలో రైతుల పరిస్థితి దయనీయంగా మారిందని, సరైన గిట్టుబాటు ధరలు లేక రైతులు నష్టాల్లో కూరుకుపోతున్నారని ఆవేదన వ్యక్తం చేశారు. గతంలో YSR Congress Party పాలనలో రైతులు సంతోషంగా ఉన్నారని, అది గ్రామాలకు వెళ్లి అడిగితే తెలుస్తుందని అన్నారు.
ప్రస్తుతం రైతులు పండించిన మొక్కజొన్న పంటను కూడా అమ్ముకోలేని పరిస్థితి నెలకొన్నదని, ప్రభుత్వం ప్రకటించిన మద్దతు ధర ఎక్కడా అమలు కావడం లేదని ఆరోపించారు. రైతు భరోసా కేంద్రాలను మూసివేయడంపై తీవ్ర అభ్యంతరం వ్యక్తం చేస్తూ, ప్రతి రైతుకు ఎకరాకు లక్ష రూపాయల సబ్సిడీ ఇస్తామన్న హామీ కూడా కాగితాలకే పరిమితమైందని విమర్శించారు.
ఇక పేదల సంక్షేమంపై మాట్లాడుతూ, మూడు సెంట్ల భూమి ఇస్తామన్న హామీ ఇప్పటికీ నెరవేరకపోవడం ప్రభుత్వ వైఫల్యానికి నిదర్శనమని అన్నారు. ఎన్నికల సమయంలో ఇచ్చిన హామీలు అమలు చేయకుండా, కూటమి నాయకులు కేవలం ముఖ్యమంత్రి, ఎంపీలు, ఉప ముఖ్యమంత్రి పేర్లను ప్రస్తావిస్తూ కాలక్షేపం చేస్తున్నారని విమర్శించారు.
రాష్ట్రంలో గ్యాస్ సిలిండర్లు కూడా బ్లాక్ మార్కెట్లో దొరకని పరిస్థితి ఉందని ఆయన పేర్కొన్నారు. వినుకొండ నియోజకవర్గంలో భూకబ్జాలు పెరిగిపోయాయని, అక్రమ వెంచర్లు ఏర్పాటు చేసి ప్రజలను మభ్యపెట్టి భూములు అమ్ముతున్నారని ఆరోపించారు.చివరిగా ప్రజలు అప్రమత్తంగా ఉండాలని, ముఖ్యంగా భూముల కొనుగోలు విషయంలో జాగ్రత్తగా వ్యవహరించాలని సూచించారు.
