పుట్టా మహేష్కు షోకాజ్ నోటీస్ జారీ చేసిన టీడీపీ…
డ్రగ్స్ ఆరోపణల వ్యవహారం రాజకీయంగా చర్చనీయాంశంగా మారిన నేపథ్యంలో టీడీపీ నాయకత్వం కీలక నిర్ణయం తీసుకుంది. ఈ కేసుకు సంబంధించి వివరణ ఇవ్వాలని ఎలూరు ఎంపీ పుట్టా మహేష్ యాదవ్ కు పార్టీ షోకాజ్ నోటీస్ జారీ చేసింది.
టీడీపీ రాష్ట్ర అధ్యక్షుడు పల్లా శ్రీనివాస రావు ఈ నోటీస్ను జారీ చేశారు. డ్రగ్స్ ఆరోపణలపై ఐదు రోజులలోపు లిఖితపూర్వకంగా సమగ్ర వివరణ ఇవ్వాలని పుట్టా మహేష్ను ఆదేశించారు.
ఇక ఈ వ్యవహారంపై పూర్తి నివేదిక అందించే వరకు పుట్టా మహేష్ పార్టీ కార్యక్రమాలకు దూరంగా ఉండాలని కూడా పల్లా శ్రీనివాస్ స్పష్టం చేశారు. నిర్దిష్ట గడువులోగా వివరణ ఇవ్వకపోతే పార్టీ క్రమశిక్షణ చర్యలు తీసుకునే అవకాశం ఉందని హెచ్చరించారు.
డ్రగ్స్ ఆరోపణలు వెలుగులోకి రావడంతో ఈ అంశం రాష్ట్ర రాజకీయాల్లో పెద్ద చర్చకు దారి తీసింది. ఈ నేపథ్యంలో పార్టీ ప్రతిష్ట దెబ్బతినకుండా ఉండేందుకు టీడీపీ నాయకత్వం వెంటనే స్పందించి షోకాజ్ నోటీస్ జారీ చేసినట్లు పార్టీ వర్గాలు చెబుతున్నాయి.
ఘటనపై స్పందించిన ఎంపీ పుట్టా మహేష్ యాదవ్…
హైదరాబాద్లోని మోయినాబాద్ ఫార్మ్హౌస్లో మార్చి 14న జరిగిన ఘటనపై పుట్టా మహేష్ యాదవ్ స్పందించారు. ఈ ఘటనలో తన పేరు ప్రస్తావనకు రావడం పూర్తిగా రాజకీయ ప్రేరేపిత చర్య అని ఆయన పేర్కొన్నారు.
సోషల్ మీడియాలో మరియు కొన్ని వర్గాల ద్వారా ప్రచారం అవుతున్న ఆరోపణలు పూర్తిగా అసత్యమని స్పష్టం చేశారు. తనపై వస్తున్న ఆరోపణలకు ఎలాంటి ఆధారాలు లేవని, తాను ఎటువంటి అక్రమ కార్యకలాపాలకు సంబంధం లేకుండా ఉన్నానని తెలిపారు.
ఈ వ్యవహారంపై తన పూర్తి న్యాయ సలహా తీసుకుంటున్నానని, తనపై తప్పుడు ఆరోపణలు చేస్తున్న వారిపై చట్టపరమైన చర్యలు తీసుకునే దిశగా ముందుకు వెళ్తున్నానని చెప్పారు. నిజం బయటపడే వరకు ఓపికగా ఉండాలని తన అనుచరులు మరియు ప్రజలకు విజ్ఞప్తి చేశారు. ఇలాంటి తప్పుడు ప్రచారాలను నమ్మవద్దని, నిజం త్వరలోనే వెలుగులోకి వస్తుందని ఆయన అన్నారు. రాజకీయంగా తనను దెబ్బతీయాలనే ఉద్దేశంతో కొన్ని వర్గాలు కావాలనే ఈ ప్రచారం చేస్తున్నాయని ఆరోపించారు. ఈ నేపథ్యంలో ఈ ఘటనపై రాజకీయ వర్గాల్లో చర్చ జరుగుతోంది. కేసుకు సంబంధించిన పూర్తి వివరాలు బయటకు రావాల్సి ఉందని, పోలీసుల దర్యాప్తు తర్వాత అసలు విషయం స్పష్టమయ్యే అవకాశం ఉందని రాజకీయవిశ్లేషకులు అభిప్రాయపడుతున్నారు.
Good information