ప్రొఫెసర్ నాగేశ్వర్పై జనసేన వరుస ఫిర్యాదులు… ‘యుద్ధం మీరు మొదలుపెట్టారు, నేను ముగిస్తాను’ అంటూ సవాల్!
అమరావతి (పొలిటికల్ టెంపర్ బ్యూరో):
రాజకీయ విశ్లేషకులు, ప్రొఫెసర్ కె. నాగేశ్వర్ ఒక ఇంటర్వ్యూలో వ్యక్తపరిచిన అభిప్రాయాల చుట్టూ ముసురుకున్న వివాదం ఇప్పుడు ఆంధ్రప్రదేశ్ రాజకీయాల్లో సరికొత్త రణరంగానికి దారితీసింది. జనసేన అధినేత పవన్ కళ్యాణ్ మరియు కేంద్ర హోంమంత్రి అమిత్ షా భేటీకి సంబంధించిన విశ్లేషణపై జనసేన శ్రేణులు తీవ్ర అభ్యంతరం వ్యక్తం చేస్తూ వరుస ఫిర్యాదులకు దిగడం, కేసులు నమోదు కావడం సంచలనంగా మారింది. అయితే ఈ వ్యవహారంలో ప్రొఫెసర్ నాగేశ్వర్కు వ్యతిరేకత కంటే మేధావి వర్గం నుండి మద్దతు వెల్లువలా పెరుగుతుండటం గమనార్హం.
ప్రొఫెసర్కు ప్రకాష్ రాజ్ మద్దతు.. రంగంలోకి విద్యావంతులు, మేధావులు!
ప్రొఫెసర్ నాగేశ్వర్పై వ్యూహాత్మకంగా జరుగుతున్న ఫిర్యాదుల పర్వంపై దేశవ్యాప్తంగా గుర్తింపు ఉన్న సినీ ప్రముఖుడు, సామాజిక విశ్లేషకుడు ప్రకాష్ రాజ్ స్పందించారు. ఆయన ప్రొఫెసర్కు సంఘీభావం ప్రకటిస్తూ మద్దతుగా నిలిచారు. ప్రకాష్ రాజ్తో పాటు రెండు తెలుగు రాష్ట్రాల్లోని వేలాది మంది విద్యావంతులు, మేధావులు, జర్నలిస్టు సంఘాలు ప్రొఫెసర్కు అండగా నిలబడుతున్నాయి. సమాజంలో ఒక గౌరవప్రదమైన స్థానం ఉన్న విద్యావేత్తపై ఈ విధంగా కక్షసాధింపు చర్యలకు దిగడం భావప్రకటన స్వేచ్ఛను హరించడమేనని వారు తీవ్రంగా ఖండిస్తున్నారు.
“యుద్ధం మీరు మొదలుపెట్టారు.. నేను ముగిస్తాను!” – ప్రొఫెసర్ కౌంటర్
ఈ పరిణామాలపై ప్రొఫెసర్ నాగేశ్వర్ ఏమాత్రం వెనక్కి తగ్గకుండా మరింత దూకుడు పెంచినట్లు తెలుస్తోంది. “యుద్ధం మీరు మొదలుపెట్టారు.. నేను ముగిస్తాను” అంటూ ఆయన పరోక్షంగా ఇచ్చిన పిలుపు ఇప్పుడు సోషల్ మీడియాలో హాట్ టాపిక్గా మారింది. విశ్లేషకుడిగా తన నోరు నొక్కేందుకు ప్రయత్నిస్తే లొంగిపోయే ప్రసక్తే లేదని, ఇకపై వ్యవస్థలోని అవినీతి, అక్రమాలపై మరింత నిర్భయంగా, దూకుడుగా ముందుకు సాగుతానని ఆయన స్పష్టం చేసినట్లు సామాజిక మాధ్యమాల్లో చర్చ నడుస్తోంది. తనకున్న సుదీర్ఘ అనుభవంతో వేలాది మంది యువతను, విద్యావంతులను ప్రభావితం చేయగల సామర్థ్యం ఉన్న ప్రొఫెసర్ నాగేశ్వర్ ఇప్పుడు పంతం పట్టినట్లు కనిపిస్తోంది.
పొలిటికల్ టెంపర్ విశ్లేషణ…
ప్రొఫెసర్ని టార్గెట్ చేసి జనసేన తప్పు చేసిందా?
రాజకీయాల్లో విమర్శలు, ప్రతివిమర్శలు చాలా సహజం. కానీ, ఒక సుపరిచిత మేధావిని, ప్రొఫెసర్ని టార్గెట్ చేయడం ద్వారా జనసేన పార్టీ రాజకీయంగా స్వయంకృతాపరాధం వైపు అడుగులు వేస్తోందా? అనే సందేహాలు వ్యక్తమవుతున్నాయి.
విశ్లేషకులకు స్వేచ్ఛ లేదా?
ప్రజాస్వామ్యంలో ఒక రాజకీయ పరిణామంపై విశ్లేషకుడు తన అభిప్రాయాన్ని చెప్పినప్పుడు, దాన్ని వాస్తవాలతో తిప్పికొట్టాలే తప్ప చట్టపరమైన కేసులతో బెదిరించాలనుకోవడం ప్రజాస్వామ్య స్ఫూర్తికే విరుద్ధం.
కూటమి ప్రభుత్వానికి అపవాదు: జనసేన ఫిర్యాదుల మేరకు కేసులు నమోదు చేయిస్తున్న కూటమి ప్రభుత్వం, ఈ చర్య ద్వారా సమాజానికి ఎలాంటి సంకేతాలు ఇస్తోందనే ప్రశ్నలు వస్తున్నాయి. విమర్శలను స్వీకరించలేని అసహన ధోరణిని ఇది చూపిస్తోందని విద్యావంతులు పెదవి విరుస్తున్నారు.
ఎడిటర్ నోట్…
ఒక ప్రొఫెసర్ పై ఫిర్యాదు చేసి జనసేన పార్టీ ప్రజలకు ఏం సంకేతం ఇవ్వదలిచిందో…. జనసేన ఫిర్యాదు మేరకు కేసు నమోదు చేయించిన కూటమి ప్రభుత్వం సమాజానికి ఏమి సంకేతం ఇవ్వదల్చిందో…. వారి విజ్ఞతకే వదిలేద్దాం…
ప్రజాస్వామ్యంలో బూతులు మాట్లాడుతూ అసత్యాలు, అవాస్తవాలు మాట్లాడే నాయకులపై కూడా సామాన్యుడు ఫిర్యాదు చేస్తే కేసులు నమోదు చేసే సాహసం చేస్తారా…? అని ప్రజాస్వామికవాదులు, విద్యావంతులు, మేధావులు గళమెత్తుతున్నారు.
అత్యంత దారుణం ఏమిటంటే…
రాజకీయ పార్టీలు అధికారంలో ఉంటే శృతిమించుతున్నాయి. తమను గానీ తమ ప్రభుత్వాన్ని గాని ఎవరైనా విమర్శించిన తమ నిర్ణయాలను తప్పు పట్టిన ఆ వ్యక్తిని రాజకీయ పార్టీలకు ఆపాదిస్తూ ప్రత్యర్థి పార్టీకి చెందిన వ్యక్తిగా సుప్రీంకరించే ప్రయత్నం చేస్తున్నారు ఎందుకు ప్రొఫెసర్ నాగేశ్వర్ వదంతమే నిదర్శనం. జనసేన పార్టీ పై విమర్శలు గుప్పించిన ప్రొఫెసర్ నాగేశ్వర్ పై సోషల్ మీడియాలో ఆయన ఫోటోకు వైసిపి కండువా వేసి వైసిపి వ్యక్తిగా చిత్రీకరించే ప్రయత్నం చేస్తున్నాయి దీని వెనుక ఎవరున్నారు అని ప్రత్యేకంగా చెప్పాల్సిన అవసరం లేదు ప్రజలకు పూర్తిగా తెలిసిపోయింది. విమర్శించిన వారికి పార్టీలో అంటగట్టడం మంచి పద్ధతి కాదన్న వాదన కూడా వినిపిస్తుంది ఇప్పటికైనా రాజకీయ పార్టీలు తమ పద్ధతి మార్చుకోకపోతే ప్రజా జీవితంలో గుణపాఠం తప్పదు అందుకు ప్రొఫెసర్ నాగేశ్వర హెచ్చరిక ఒక గుణపాఠంగా మారుతుంది అనడంలో సందేహం లేదు.
- ఎడిటర్, పొలిటికల్ టెంపర్
