చంద్రబాబుకి ఒక న్యాయం.. బోండా ఉమాకి మరో న్యాయమా…???
ఆంధ్రప్రదేశ్ రాజకీయాల్లో ప్రస్తుతం బోండా ఉమామహేశ్వరరావు, అంబటి రాంబాబు వేదిక పంచుకోవడంపై రేగిన దుమారం తీవ్ర చర్చనీయాంశంగా మారింది. గుంటూరులో జరిగిన ముద్రగడ పద్మనాభం సంస్మరణ సభకు హాజరైన బోండా ఉమా, అంబటి రాంబాబుతో చిరునవ్వుతో సంభాషించడంపై టీడీపీ అధిష్టానం ఆగ్రహం వ్యక్తం చేయడం, విచారణకు త్రీమెన్ కమిటీని వేయడం పొలిటికల్ సర్కిల్స్లో హాట్ టాపిక్గా మారింది.
అయితే, ఈ వ్యవహారంలో వైఎస్సార్సీపీ నేత అంబటి రాంబాబు ఊహించని విధంగా బోండా ఉమాకు అండగా నిలవడం గమనార్హం. గతంలో నటుడు తారకరత్న పార్థివదేహానికి నివాళులర్పించేందుకు వెళ్లిన సమయంలో చంద్రబాబు నాయుడు, వైఎస్సార్సీపీ నేత విజయసాయిరెడ్డి అత్యంత ఆప్యాయంగా మాట్లాడుకున్న ఫోటోను అంబటి ‘X’ (ట్విట్టర్) వేదికగా గుర్తు చేశారు. “నాడు చంద్రబాబు – విజయసాయిరెడ్డి కలయికలో లేని తప్పు, నేడు బోండా ఉమాతో నేను మాట్లాడితే తప్పు ఎలా అవుతుంది?” అని ప్రశ్నిస్తూ అంబటి వేసిన కౌంటర్ బాణాలు టీడీపీ వర్గాలను ఆలోచనలో పడేశాయి.
సంస్మరణ సభలు, సంతాప కార్యక్రమాలకు రాజకీయాలకు సంబంధం లేదని, ఇలాంటి మానవీయ వేదికలకు నేతలు వెళ్లకుండా కట్టడి చేయడం సరికాదని అంబటి పేర్కొన్నారు. చంద్రబాబు స్వయంగా ఒక రాజకీయేతర సందర్భంలో ప్రత్యర్థి పార్టీ నేతను కలవవచ్చు కానీ, సొంత పార్టీ నేత బోండా ఉమా విషయంలో మాత్రం కమిటీలు వేసి విచారణ జరుపుతారా అని విమర్శలు గుప్పిస్తూ ఉమాకు నైతిక మద్దతుగా నిలిచారు.
చంద్రబాబు నాయుడు కొన్ని విషయాల్లో తీవ్రమైన పట్టు విడుపులు ప్రదర్శించకపోవడం, చివరకు అది ఆయన వైపే వేలెత్తి చూపేలా పరిస్థితులను తీసుకొస్తోంది. రాజకీయ వైరానికి, వ్యక్తిగత/సంస్కారవంతమైన సంభాషణలకు తేడా గుర్తించకుండా, బోండా ఉమా విషయంలో అనవసరంగా కఠినంగా వ్యవహరించడం వల్ల టీడీపీకి రాజకీయంగా నష్టం చేకూరే అవకాశం ఉందన్న అభిప్రాయాలు వ్యక్తమవుతున్నాయి. ముద్రగడ సంస్మరణ కార్యక్రమానికి హాజరైన ఉమాపై చర్యలకు దిగడం ద్వారా ఇటు కాపు సామాజికవర్గానికి, అటు రాష్ట్ర ప్రజల్లోనూ ఒకింత ఆగ్రహానికి బాటలు వేసినట్లయిందనే విశ్లేషణలు వినిపిస్తున్నాయి.
ఇప్పటికైనా చంద్రబాబు నాయుడు ఇలాంటి సున్నితమైన అంశాల్లో పట్టువిడుపులు ప్రదర్శించి జాగ్రత్త పడితేనే రాబోయే రోజుల్లో పార్టీకి, నాయకత్వానికి మేలు జరుగుతుందని రాజకీయ విశ్లేషకులు భావిస్తున్నారు. మరోవైపు, అధిష్టానం వేసిన త్రీమెన్ కమిటీ ముందు హాజరై తన నిష్కళంకమైన వైఖరిని స్పష్టం చేస్తానని, తాను పార్టీకి నష్టం కలిగించే పని ఏదీ చేయలేదని బోండా ఉమా ధీమా వ్యక్తం చేస్తున్నారు.
ఎడిటర్.
