బీసీ రిజర్వేషన్ల వివాదం…. కూటమికి హైకోర్టు షాక్.. స్థానిక సమరంలో పైచేయి ఎవరిది?
ఆంధ్రప్రదేశ్ స్థానిక సంస్థల ఎన్నికల వేళ రాజకీయ సమీకరణాలు అనూహ్య మలుపు తిరిగాయి. బీసీలకు 34 శాతం రిజర్వేషన్లు కల్పిస్తూ కూటమి ప్రభుత్వం జారీ చేసిన ఉత్తర్వులను రాష్ట్ర అత్యున్నత న్యాయస్థానం కొట్టివేయడం ప్రభుత్వానికి పెద్ద ఎదురుదెబ్బగా మారింది. మొత్తం రిజర్వేషన్లు 50 శాతం పరిమితి మించకూడదన్న సుప్రీంకోర్టు తీర్పునకు విరుద్ధంగా ప్రభుత్వం తీసుకువచ్చిన జీవోలు ఉన్నాయని హైకోర్టు స్పష్టం చేసింది. అంతేకాకుండా, వార్డుల పునర్విభజనలో ఎలాంటి మార్పులు లేకుండా తుది ఓటర్ల జాబితా ఆధారంగా రాబోయే ఆరు వారాల్లోగా స్థానిక సమరాన్ని పూర్తి చేయాలని రాష్ట్ర ఎన్నికల సంఘాన్ని ఆదేశించడంతో అధికార కూటమి వ్యూహాలకు గండిపడింది. స్థానిక సంస్థల ఎన్నికల్లో బీసీ వర్గాలను ఆకర్షించి భారీ మెజారిటీ సాధించాలని భావించిన కూటమి నేతలకు ఈ తీర్పు మింగుడుపడటం లేదు.
మరోవైపు హైకోర్టు తీర్పును ప్రతిపక్ష వైఎస్సార్‌సీపీ రాజకీయ అస్త్రంగా మార్చుకుంది. సరైన చట్టబద్ధమైన ప్రక్రియలు, డెడికేటెడ్ కమిషన్ ఆధారాలు లేకుండా హడావుడిగా జీవోలు తెచ్చి బీసీలను కూటమి మోసం చేసిందంటూ తాము చేసిన ఆరోపణలు నిజమయ్యాయని వైఎస్సార్‌సీపీ శ్రేణులు ప్రచారం మొదలుపెట్టాయి. గతంలో తమ హయాంలో కూడా ఇదే 50 శాతం నిబంధన వల్ల రిజర్వేషన్లు తగ్గించాల్సి వచ్చిందని, ఇప్పుడు కూటమి నాయకులు తెలిసీ డ్రామాలు ఆడారని ఆ పార్టీ ఎండగడుతోంది. అటు బీసీ సంఘాల్లోనూ ప్రభుత్వ తీరుపై అసంతృప్తి వ్యక్తమవుతుండటంతో, రానున్న ఆరు వారాల్లో జరగబోయే మున్సిపల్, పంచాయతీ పోరులో ఈ రిజర్వేషన్ల రగడ ప్రధాన ప్రచారాంశంగా మారడం ఖాయంగా కనిపిస్తోంది. స్థానిక సమరానికి సిద్ధం కావాల్సిన వేళ న్యాయపరంగా వచ్చిన ఈ ఎదురుదెబ్బను కూటమి ఎలా అధిగమిస్తుందో, ప్రతిపక్షం దీన్ని ఏ మేరకు ఓట్లుగా మలుచుకుంటుందో వేచి చూడాలి.
