రాష్ట్రంలో ముఖ్యం గా రెండు నూతన పెన్షన్లు, 18 ఏళ్ళు నిండిన ప్రతి మహిళలకి నెల రూ. 1500 ల ఆర్ధిక సాయం పధకాల అమలు పై ప్రజలు ఆశగా ఎదురు చూస్తున్నారు. ఈ నేపథ్యంలో ఉగాది పండుగ రోజున ఈ పధకాలు అమలు పై సిఎం చంద్రబాబు నాయుడు కీలక ప్రకటన చేసే అవకాశం ఉందని రాజకీయ వర్గాల్లో చర్చ నడుస్తోంది.
ఉగాది రోజున క్లారిటీ ఇస్తుందా ప్రభుత్వం..?
ఆంధ్ర ప్రదేశ్రా జకీయాల్లో ఇప్పుడు సూపర్ సిక్స్ పథకాల అమలు ప్రధాన చర్చగా మారింది. ఎన్నికల సమయంలో చంద్రబాబు నాయుడు నాయకత్వంలోని కూటమి సూపర్ సిక్స్ హామీలలో ముఖ్యంగా ప్రతి మహిళకు నెలకు రూ.1500 ఆర్థిక సహాయం మరియు కొత్త సామాజిక భద్రత పెన్షన్లు ఎప్పుడు అమలులోకి వస్తాయన్నది ఇప్పుడు ఆసక్తికరంగా మారింది.
ప్రతి మహిళకు రూ.1500 పథకం…
18 సంవత్సరాలు నిండిన ప్రతి మహిళకు నెలకు రూ.1500 అందించే పథకం ఎన్నికల సమయంలో పెద్ద హామీగా నిలిచింది. ఈ పథకం అమలైతే మహిళల ఆర్థిక భద్రత పెరుగుతుందని ప్రభుత్వం చెబుతోంది. అంచనాల ప్రకారం ఆంధ్రప్రదేశ్లో 18 సంవత్సరాలు పైబడిన మహిళలు సుమారు 2.2 కోట్ల నుంచి 2.4 కోట్ల వరకు ఉన్నారు. ఈ మహిళలందరికీ నెలకు రూ.1500 చొప్పున ఇస్తే ప్రభుత్వానికి భారీ స్థాయిలో నిధులు అవసరం అవుతాయి.
ప్రభుత్వంపై ఎంత ఖర్చు..?
ఒక్క మహిళకు నెలకు రూ.1500 ఇస్తే
ఒక మహిళకు సంవత్సరానికి: రూ.18,000
సుమారు 2.3 కోట్ల మహిళలకు సంవత్సరానికి: దాదాపు రూ.41,000 కోట్ల వరకు ఖర్చు అయ్యే అవకాశం ఉందని అంచనా.
ఈ భారీ మొత్తాన్ని ప్రభుత్వం ఎలా సమకూర్చుకుంటుందన్నది ఇప్పుడు ప్రధాన చర్చగా మారింది.
కొత్త పెన్షన్లపై ఎదురు చూపులు…
ఇక మరో కీలక హామీ కొత్త సామాజిక భద్రత పెన్షన్లు. కొత్తగా అర్హత సాధించిన పలువురు లబ్ధిదారులు ఇప్పటికీ పెన్షన్ మంజూరుకు ఎదురు చూస్తున్నారు. దీంతో ఈ అంశంపై ప్రభుత్వం త్వరగా నిర్ణయం తీసుకోవాలని డిమాండ్ పెరుగుతోంది.
ఉగాది రోజున క్లారిటీ..?
రాజకీయ వర్గాల్లో వినిపిస్తున్న సమాచారం ప్రకారం ఉగాది సందర్భంగా ఈ రెండు పథకాల అమలుపై ప్రభుత్వం స్పష్టత ఇచ్చే అవకాశం ఉందని ప్రచారం జరుగుతోంది. ముఖ్యంగా
మహిళలకు రూ.1500 పథకం
కొత్త పెన్షన్ల మంజూరు
ఈ రెండు పథకాల విధి విధానాలు (గైడ్లైన్స్ ) ప్రకటించే అవకాశముందని చెబుతున్నారు.
అమలు తర్వాతే స్థానిక ఎన్నికల దిశగా..?
ఈ పథకాలు అమలు చేసి ప్రజలకు ప్రయోజనం చేరిన తర్వాతే స్థానిక సంస్థల ఎన్నికలకు వెళ్లాలని చంద్రబాబు నాయుడు భావిస్తున్నారని రాజకీయ వర్గాల్లో చర్చ జరుగుతోంది. ముఖ్యంగా మహిళలు, పేదలకు ఇచ్చిన హామీలు అమలు అయితేనే ఎన్నికలకు వెళ్లడం రాజకీయంగా లాభదాయకమని కూటమి అంచనా వేస్తోందని సమాచారం.
రాజకీయంగా ఎందుకు కీలకం..?
మహిళలకు నేరుగా నగదు అందించే పథకాలు గ్రామీణ స్థాయిలో పెద్ద ప్రభావం చూపే అవకాశం ఉంది. దీంతో ఈ పథకాల అమలు త్వరలో జరిగే స్థానిక ఎన్నికలపై కూడా ప్రభావం చూపవచ్చని రాజకీయ విశ్లేషకులు భావిస్తున్నారు.
దీంతో ఇప్పుడు అందరి దృష్టి ఉగాది రోజున ప్రభుత్వం చేసే ప్రకటనపై నిలిచింది.
