వైసీపీ నాయకులపై మండిపడ్డ జీవీ ఆంజనేయులు -

వినుకొండలో నిర్వహించిన విలేకరుల సమావేశంలో రాష్ట్ర చీఫ్ విప్ జీవీ ఆంజనేయులు ప్రతిపక్షాలపై తీవ్రస్థాయిలో విమర్శలు చేశారు. వైసీపీ నాయకులు అధికారంలో ఉన్నప్పుడు ఒకలా, ప్రతిపక్షంలో ఉన్నప్పుడు మరోలా ప్రవర్తిస్తున్నారని ఆయన మండిపడ్డారు. వైసీపీ ప్రజలను తప్పుదారి పట్టించేలా అసత్య ప్రచారం చేస్తోందని ఆరోపించారు. వైసీపీ ప్రభుత్వం హయాంలో ఒక్క రైతుని కూడా ఆదుకోలేదని ప్రశ్నించిన జీవీ ఆంజనేయులు, రైతుల వద్ద నుంచి ధాన్యం కొనుగోలు చేసి నెలల తరబడి డబ్బులు చెల్లించలేదని విమర్శించారు. అబద్ధాలు చెప్పడంలో వైసీపీ నాయకుడు బొల్లా బ్రహ్మ నాయుడు ముందుంటారని వ్యాఖ్యానించారు. “మీరు నీతులు చెప్పడం దొంగే దొంగ అన్నట్టుంది” అంటూ ప్రతిపక్షాలపై విమర్శలు గుప్పించారు. మొక్కజొన్న రైతులను కూడా ప్రభుత్వం ఆదుకుంటుందని, రైతులకు అవసరమైన మద్దతు అందిస్తామని తెలిపారు. అదేవిధంగా, పల్నాడు జిల్లాలో 50 వేల ఎకరాల్లో హార్టికల్చర్ పంటలను ప్రోత్సహించేందుకు తాను ప్రయత్నిస్తున్నానని జీవీ తెలిపారు. వైసీపీ హయాంలో రైతులకు జరిగిన నష్టాన్ని ప్రస్తుత కూటమి ప్రభుత్వం భర్తీ చేస్తుందని స్పష్టం చేశారు. పల్నాడు జిల్లాకు హామీలు ఇచ్చిన ముఖ్యమంత్రి నారా చంద్రబాబు నాయుడుకు ఈ సందర్భంగా కృతజ్ఞతలు తెలిపారు. ఐదేళ్ల పాటు వైసీపీ అసత్య ప్రచారాలను విని ప్రజలు తగిన సమాధానం ఇచ్చారని జీవీ ఆంజనేయులు అన్నారు. కార్యక్రమం లో టీడీపీ పట్టణ అధ్యక్షుడు బొంకూరి రోశయ్య , టీడీపీ నాయకులు పెమ్మసాని నాగేశ్వరావు, పీవీ సురేష్, వెంకట నారాయణ తదితరులు పాల్గొన్నారు.