అసెంబ్లీలో “అమరావతి” తీర్మానం

ఆంధ్రప్రదేశ్ అసెంబ్లీలో అమరావతి అంశంపై అత్యంత కీలక పరిణామాలు చోటుచేసుకున్నాయి.  ప్రత్యేక సమావేశంలో ముఖ్యమంత్రి అమరావతిని రాష్ట్ర శాశ్వత రాజధానిగా ప్రకటిస్తూ, దానికి చట్టబద్ధత కల్పించాలని కోరుతూ కీలక తీర్మానాన్ని ప్రవేశపెట్టారు. ప్రభుత్వం మారినప్పుడల్లా రాజధాని నిర్ణయాలు మారి ప్రజలలో అనిశ్చితి కలగకుండా ఉండేలా, అమరావతికి పూర్తి స్థాయి చట్టబద్ధత కల్పించాలని మరియు ఆ తీర్మానాన్ని కేంద్ర ప్రభుత్వానికి పంపాలని ప్రభుత్వం నిర్ణయించింది.

తీర్మానం ప్రధాన ఉద్దేశ్యం…

ఆంధ్రప్రదేశ్ అసెంబ్లీలో ప్రవేశపెట్టిన ఈ తీర్మానం ప్రధాన ఉద్దేశ్యం “అమరావతికి శాశ్వత చట్టబద్ధత” కల్పించడం. 2014 విభజన చట్టం ప్రకారం పదేళ్ల ఉమ్మడి రాజధాని గడువు ముగిసినప్పటికీ, చట్టంలో ఏపీ రాజధానిగా ఏ నగర పేరు స్పష్టంగా లేదు. గత ప్రభుత్వం “మూడు రాజధానుల” పేరుతో తెచ్చిన అనిశ్చితి వల్ల రాష్ట్ర అభివృద్ధి కుంటుపడింది.  భవిష్యత్తులో ఏ ప్రభుత్వం వచ్చినా, కేవలం రాజకీయ ప్రయోజనాల కోసం రాజధానిని మార్చకుండా ఉండాలంటే ఏపీ పునర్వ్యవస్థీకరణ చట్టం, 2014లోని సెక్షన్ 5(2) ను సవరించడం తప్పనిసరి. ఈ తీర్మానం ద్వారా “నవ రాజధాని” అనే పదం స్థానంలో “అమరావతి”ని చేర్చాలని కేంద్రాన్ని కోరుతున్నారు.

పార్లమెంట్ ఆమోదం తర్వాత….
ఈ తీర్మానం అసెంబ్లీలో ఆమోదం పొంది కేంద్రానికి పంపిన తర్వాత, కేంద్ర ప్రభుత్వం పార్లమెంట్‌లో సవరణ బిల్లును ప్రవేశపెడుతుంది. ఇది ఆమోదం పొందితే

 చట్టపరమైన రక్షణ: అమరావతికి పార్లమెంటరీ స్థాయి రక్షణ లభిస్తుంది. రాష్ట్ర ప్రభుత్వాలు మారినంత మాత్రాన రాజధానిని మార్చడం సాధ్యం కాదు.
 పెట్టుబడుల వెల్లువ: అంతర్జాతీయ సంస్థలు మరియు కేంద్ర ప్రభుత్వ సంస్థలు ఎటువంటి భయం లేకుండా అమరావతిలో పెట్టుబడులు పెట్టడానికి ముందుకు వస్తాయి.
స్థిరమైన అభివృద్ధి: రాజధానిపై ఉన్న న్యాయపరమైన చిక్కులన్నీ తొలగిపోయి, నిర్మాణ పనులు శరవేగంగా సాగడానికి మార్గం సుగమం అవుతుంది.

ప్రజల రాజధాని అమరావతి : ముఖ్యమంత్రి నారా చంద్రబాబు నాయుడు 

ముఖ్యమంత్రి తన ప్రసంగంలో అమరావతిని కేవలం ఒక నగరంలా కాకుండా “ప్రజల రాజధాని”గా అభివర్ణించారు. శాతవాహనుల కాలం నుంచే అమరావతికి ఉన్న చారిత్రక ప్రాధాన్యతను గుర్తు చేస్తూ, దీనిని దేశంలోనే అగ్రస్థానంలో నిలబెట్టే లక్ష్యంతో ప్రభుత్వం ముందుకు సాగుతోందని ప్రకటించారు. గతంలో హైదరాబాద్‌ను సైబరాబాద్‌గా తీర్చిదిద్ది అంతర్జాతీయ పటంలో నిలిపిన అనుభవంతో, అమరావతిని కూడా ప్రపంచ స్థాయి నగరంగా అభివృద్ధి చేస్తామని ధీమా వ్యక్తం చేశారు. గత ప్రభుత్వం మూడు రాజధానుల పేరుతో రాష్ట్ర అభివృద్ధిని తీవ్రంగా దెబ్బతీసిందని విమర్శిస్తూ, అమరావతికి శాశ్వత చట్టబద్ధత కల్పించడం ద్వారా పెట్టుబడిదారుల్లో నమ్మకాన్ని పునరుద్ధరిస్తామని చెప్పారు. ప్రతి ప్రభుత్వం మారినప్పుడల్లా రాజధాని మారే పరిస్థితి ఉండకూడదని, అందుకే ఈ తీర్మానాన్ని కేంద్రానికి పంపి విభజన చట్టంలో సవరణ కోరుతున్నామని స్పష్టం చేశారు.

స్థిరమైన రాజధాని లేకపోవడం విచారం :  పవన్ కళ్యాణ్ 
ఉప ముఖ్యమంత్రి తన ప్రసంగంలో రాష్ట్రానికి ఇంకా స్థిరమైన రాజధాని లేకపోవడం పట్ల విచారం వ్యక్తం చేశారు. అభివృద్ధికి రాజకీయ స్థిరత్వం అనేది అత్యంత కీలకమని, పదే పదే రాజధానులను మార్చడం వల్ల రాష్ట్ర ప్రతిష్ట దెబ్బతింటుందని నొక్కిచెప్పారు. విభజన తర్వాత ఆంధ్రప్రదేశ్ ఎదుర్కొన్న అత్యంత క్లిష్ట పరిస్థితుల్లో కూడా రాజధాని నిర్మాణానికి పునాది వేసిన చంద్రబాబును ఒక విజనరీ నాయకుడిగా కొనియాడారు. రాజధాని కోసం భూములిచ్చిన అమరావతి రైతుల త్యాగాన్ని ప్రశంసిస్తూ, గత ప్రభుత్వం వారిని నిర్బంధించి ఇబ్బందులకు గురిచేసిందని ఆరోపించారు. అమరావతిని నిలబెట్టుకోవడం అంటే రాష్ట్ర భవిష్యత్తును నిలబెట్టుకోవడమేనని, అందుకే కూటమి ప్రభుత్వం ఈ చారిత్రక నిర్ణయం తీసుకుందని వివరించారు.

ఒకే రాష్ట్రం – ఒకే రాజధాని : మంత్రి నారా లోకేష్ 
మంత్రి లోకేష్ తన ప్రసంగంలో  “ఒకే రాష్ట్రం – ఒకే రాజధాని – అభివృద్ధి వికేంద్రీకరణ” అనేది తమ ప్రభుత్వ ప్రధాన విధానమని స్పష్టం చేశారు. అమరావతి అభివృద్ధి చెందడం వల్ల ఇప్పటికే స్థానిక ప్రజల జీవన ప్రమాణాలు మెరుగయ్యాయని, భూముల విలువలు పెరిగి ఆ ప్రాంతం ఆర్థికంగా పుంజుకుందని తెలిపారు. గత పాలకుల తీరును విమర్శిస్తూ, ఎన్నికల ముందు అమరావతికి మద్దతు తెలిపి, అధికారం లోకి వచ్చాక మూడు రాజధానుల ప్రతిపాదన తెచ్చి ప్రజలను వంచించారని మండిపడ్డారు. గత ఐదేళ్ల పాలనలో రాష్ట్రానికి పెట్టుబడులు రాకుండా పోయాయని, ఇప్పుడు మళ్లీ తాము పెట్టుబడులను ఆకర్షిస్తున్నామని చెప్పారు. రాజధాని నిర్మాణంలో రైతుల నమ్మకాన్ని వమ్ము చేయబోమని, ఈ తీర్మానం ద్వారా అమరావతికి కేంద్రం నుంచి కూడా గట్టి రక్షణ లభిస్తుందని పేర్కొన్నారు.