ఆంధ్రప్రదేశ్ రాజకీయాల్లో ఇప్పుడు ఎక్కడ చూసినా “263” అనే అంకె మార్మోగిపోతోంది. నియోజకవర్గాల పునర్విభజన (Delimitation) జరిగితే రాష్ట్రంలో అసెంబ్లీ స్థానాల సంఖ్య ప్రస్తుతమున్న 175 నుండి 263కు పెరుగుతుందనే అంచనాలు, వైసీపీ శ్రేణుల్లో కొత్త ఉత్సాహాన్ని నింపాయి. గతంలో “వై నాట్ 175” అన్న నినాదంతో వెళ్లిన ఆ పార్టీ, ఇప్పుడు ఏకంగా “263/263” అంటూ బ్యానర్లు కడుతోంది.
ఏపీలో 263 సీట్ల సెగ.. కూటమికి వైసీపీ ‘ఒంటరి’ సవాల్…
ఆంధ్రప్రదేశ్ రాజకీయాల్లో నియోజకవర్గాల పునర్విభజన అంశం ఇప్పుడు ఒక మహా చదరంగాన్ని తలపిస్తోంది. గత ఎన్నికల్లో “వై నాట్ 175” నినాదంతో బరిలోకి దిగి 11 సీట్లకే పరిమితమైన వైసీపీ, ఇప్పుడు మారుతున్న సమీకరణాలతో సరికొత్త వ్యూహాన్ని తెరపైకి తెచ్చింది. రాబోయే కాలంలో రాష్ట్రంలో అసెంబ్లీ స్థానాల సంఖ్య 175 నుండి 263కు పెరుగుతుందనే అంచనాల నేపథ్యంలో, వైసీపీ శ్రేణులు “263/263” లక్ష్యంతో పోస్టర్లు కడుతూ రాజకీయ వేడిని పెంచాయి. ముఖ్యంగా ఉమ్మడి జిల్లాల వారీగా చూస్తే.. జనాభా ప్రాతిపదికన తూర్పు, పశ్చిమ గోదావరి జిల్లాల్లో సీట్లు 34 నుండి దాదాపు 50కి, కృష్ణా, గుంటూరు జిల్లాల్లో 33 నుండి 50 వరకు, విశాఖపట్నం పరిధిలో స్థానాలు భారీగా పెరిగే అవకాశం ఉంది. అలాగే రాయలసీమలోని కర్నూలు, అనంతపురం జిల్లాల్లోనూ అదనపు నియోజకవర్గాలు ఏర్పడనున్నాయి.
ఈ పరిణామాల మధ్య వైసీపీ విసిరిన కొత్త ఛాలెంజ్ ఇప్పుడు రాష్ట్రవ్యాప్తంగా సంచలనంగా మారింది. ఒకవేళ 263 స్థానాలు ఏర్పడితే, చంద్రబాబు నాయకత్వంలోని తెలుగుదేశం కానీ, పవన్ కళ్యాణ్ జనసేన కానీ.. పొత్తులు లేకుండా ఒంటరిగా అన్ని స్థానాల్లోనూ అభ్యర్థులను నిలబెట్టే దమ్ముందా అని వైసీపీ సూటిగా ప్రశ్నిస్తోంది. అటు కూటమి పార్టీలు ఈ సీట్ల పెంపు తమకే కలిసి వస్తుందని భావిస్తుండగా, వైసీపీ మాత్రం పెరిగే ప్రతి కొత్త నియోజకవర్గం తమ సంక్షేమ పథకాల ద్వారా తమ ఖాతాలోకే చేరుతుందని ధీమా వ్యక్తం చేస్తోంది. సీట్ల సంఖ్య పెరగడం ఎవరికి రాజకీయ వరం అవుతుంది? ఏ పార్టీ కొంప ముంచుతుంది? భవిష్యత్తులో ఈ 263 స్థానాలు నాయకుల తలరాతలను ఎలా మార్చబోతున్నాయో వేచి చూడాలి.
